Fuente: Auñamendi Eusko Entziklopedia
Manuel María Smith Ibarra.
John Smith Fitzen, XVIII. mendean Bizkaira iritsitako irlandar ugarietako baten, ondorengoa zen. Urduñako Jesuiten Kolegioan egin zituen lehen ikasketak, eta marrazketarako zituen ezaugarriengatik nabarmendu zen. 1896an hasi zituen Madrilgo Arkitektura Eskolan goi mailako ikasketak, eta bertan hasi zen aparteko gaitasunengatik nabarmentzen, beraz, 1902an, Alfontso XIII.aren eskutik Arkitekturako Eskolaren ikasle nabarmenenaren domina jaso zuen, eta 1904an, arkitekto-titulua.
Lehen garaitik nabarmentzekoa da Bilboko Atxuri geltoki berria (1913-1915), “Uso-tiroa” eta Madrilgo Antonio Garay Egoitza. Aipatzekoak dira Neguriko (Getxo) Portuko pasealekuan egindako Carlos Lewisonen etxea, 1908ko proiektua; Zugazarteko (Getxo) Luis Aranaren etxea; Victor Chavarriren Artaza jauregia, Leioako errepidean, Martinez Rivas familiaren jauregia, Algortan; Emilio Ibarraren etxea, Atxekolandetan (Getxo); Luis Lezama Leguizamonen jauregia, Getxon, eta beste hainbat eraikin garrantzitsu, hala nola Carlton Hotela.
